ദോഹ: യാത്രക്കാർ തങ്ങളുടെ വ്യക്തിഗത ആവശ്യങ്ങൾക്കായി നിയന്ത്രിത മരുന്നുകൾ (Controlled Medications) കൈവശം വെക്കുന്നതിനായുള്ള പെർമിറ്റിനായി ഇലക്ട്രോണിക് സംവിധാനം വഴി മുൻകൂട്ടി അപേക്ഷിക്കണമെന്ന് ഖത്തർ പൊതുജനാരോഗ്യ മന്ത്രാലയം നിർദ്ദേശിച്ചു. കൃത്യസമയത്ത് അപേക്ഷിക്കുന്നത് നടപടിക്രമങ്ങൾ വേഗത്തിലാക്കാനും മരുന്നുകളുടെ സുരക്ഷിതമായ ഉപയോഗം ഉറപ്പാക്കാനും സഹായിക്കുമെന്ന് മന്ത്രാലയം വ്യക്തമാക്കി.
പെർമിറ്റ് ലഭിക്കുന്നതിനായി യാത്ര തിരിക്കുന്നതിന് കുറഞ്ഞത് 5 പ്രവൃത്തി ദിവസങ്ങൾ മുൻപെങ്കിലും അപേക്ഷ സമർപ്പിക്കണം. അപേക്ഷയോടൊപ്പം കാലാവധിയുള്ള മെഡിക്കൽ പ്രിസ്ക്രിപ്ഷനും (Medical Prescription) ആവശ്യമായ മറ്റ് ഔദ്യോഗിക രേഖകളും നിർബന്ധമായും സമർപ്പിക്കേണ്ടതുണ്ട്.
ആവശ്യമായ എല്ലാ രേഖകളും കൃത്യമായി സമർപ്പിച്ചാൽ 3 പ്രവൃത്തി ദിവസങ്ങൾക്കുള്ളിൽ അപേക്ഷയിൻമേൽ തീരുമാനമെടുത്ത് (അംഗീകാരം നൽകുകയോ നിരസിക്കുകയോ) നടപടികൾ പൂർത്തിയാക്കും. യാത്രക്കാർക്ക് നടപടികൾ എളുപ്പമാക്കുന്നതിനും രാജ്യത്തെ നിയമങ്ങൾ പാലിച്ചുകൊണ്ട് ഇത്തരം മരുന്നുകൾ സുരക്ഷിതമായി കൈകാര്യം ചെയ്യുന്നതിനുമാണ് ഈ ഓൺലൈൻ സംവിധാനം ഏർപ്പെടുത്തിയിരിക്കുന്നതെന്ന് അൽ ഷർഖ് വെബ്‌സൈറ്റ് റിപ്പോർട്ട് ചെയ്തു.
